الخميس، 5 مايو 2011
من يوم ما اتولدنا واحنا عايشين فى مصر
على أرضها بنمشى فوق ترابها وحبيناها
ما قبلناش فى مرة حد يقول كلمة تمسها
إتربينا على نشيد بلادى نغنيه الصبح فى الطابور
واللى ما يغنيش يا ويله من المدير
العلم نشوفه كل يوم بيرفرف فوق سور المدرسة
وفوق منصة الإذاعة بيرفرف منور
ونلف حواليه ونغنى بلادى بلادى لك حبى وفؤادى
ونضحك ويبقى شئ أساسى
نشيد الوطن كل صبح
ونكبر شوية ونكبر كمان شوية ونكبر كمان
وكل يوم بنكبر فيه نسمع الهموم من الكبار ونكدهم على البلد
ما نفهمش حاجة قد ما احنا فاهمين إن مصر دى أمنا وغالية علينا
ونغنى مع نشيد البلد مصر هى أمى نيلها هو دمى
ونكبر كمان يومين ونبقى فى الخمنشارات كدة ونبدأ
نبدأ نفهم حبة حبة ليه الكبار متضايقين من البلد
نبدأ ندخل فى إمتحانات الثانوى ونشتم فى الوزارة
ونشتم فى الحكومة ونشتم فى مسئولين الإدارة
ونتعكنن ونحط الغلط ع الوزارة هى اللى فيها ناس مش ولا بد
دول شوية حمير وبجم ,, دول مابيفهموش دول أغبية
وبعديها بكام يوم نبدأ نهتم بالجرايد والأخبار ونشوف
نشوف أخبار البلد والمسئولين والحكومة
نشوف السرقة والنهب والظلم
نشوف الحرامية والنصابين
نشوف نواب الشعب اللى فضايحهم بتلالى فى السما
نسمع ع الفضائيات كلام زى المر ونقول دة ليه ؟؟
نقول الجزيرة بتشمت فينا وبتدورلنا على غلطة
نقول البلد الفلانية كارهانا ومابتصدق تسمع عننامصيبة
نقول بلدنا مافيش زيها دول ناس كرهانا ونتخنق
ما انتو لازم تبقو فاكرين إن مصر هى أمى
لكن يا ويلنا لما نكبر كمان يومين ونعرف الخبايا
وندور ونفتش ونهتم أكتر ونتغم أكتر وأكتر
وبعدين نسمع ونهتم بالمعارضة والأحزاب
ونقول الحزب الفلانى عدل والحزب العلانى هباب
نبدأ فى التفكير اللى ممكن يودى فى داهية
وتاخدنا الوطنية أوى ونقول يلا مظاهرة
وأهالينا فى البيوت يهللوا ويزعقوا واحنا
عايزين نغير ونعمل حاجة للبلد
ويبدأ مشوار جديد ونفضل نقول
مصر هى أمى وبحبك يا أمى
الاشتراك في:
تعليقات الرسالة (Atom)
0 التعليقات:
إرسال تعليق