الاثنين، 2 مايو 2011
بما إنكم منكن تكونو أول مرة تعرفونى عن طريق المدونة فالمفروض إنى أعرفكم أنا مين وليه عملت المدونة :)
أنا بنت مصرية مسلمة عربية شرق أوسطية قمحاوية لون أغلى حباية بتنزرع فى تربة بلادى عاشقة كل حاجة بردك زى بلادى ما عشقت النيل .. إسمى عربى أصيل مأصل خديجة الخطيب زى أى حد فى البلد دى بحبها بعشقها بموت فى كل حبة تراب فيها بس ما كنتش دريانة ولا واخدة بالى من العشق اللى أنا واقعة فيه .
بدرس خدمة إجتماعية بحاول بقدر الإمكان أنجح فيها كمهنة كويسة جداً ومحتاجينها فى بلدنا بس اللى يدرى بقى :)
نشأت واتربيت وطلعت للدنيا فى منطقة شعبية جداً البساتين قضيت فى شوارعها وحواريها 16 سنة من عمرى حفظت كل حاجة فيها حتى كلام الأهالى حتى الضحكة بتطلع إمتة عرفتها .
طلعت فى بيت قديم من بيوت زمان اللى تحس وانت قاعد فيه غنه هيقع عليك من كتر الشروخ اللى منكن تشوفها ع الحيطان وتشوف خرايط العالم كله على حيطة واحدة :)
تعليمى الإبتدائى كان فى مدرسة حكومى بس الحق يتقال كانت مدرسة كويسة جداً الفيروز فيها ومع مدرسى الغالى أ.يسرى خطيت أول كلماتى فى محاولتى للكتابة وكان دايماً يشجعنى , كنت شقية جداً جداً وكنت مجننة أساتذتى وأبلواتى وما كنتش بسمع الكلام خالص ما كنتش بحب أسكت على أى حاجة لازم أنطق .
فى الإعدادية مدرسة حكومى بردك كانت كويسة وكانت المرحلة اللى نسيت فيها الكتابة والشعر تماماً لغاية ما قابلت أستاذى أ.يسرى من تانى ولقيت نفسى بدأت أكتب واتشجع .
مرحلة الثانوى بالنسبة ليا كانت مرحلة عذاب وهبوط وصعود ومن ثم هبوط تانى بس للأسف رسيت بيا للهبوط وإنى كان مجموعى ما يسمحليش أدخل الكلية اللى طول عمرى بحلم بيها إعلام ولا أحقق الحلم اللى حلمت بيه كتير وإنى أبقى صحفية وكان مجموعى هناك فى جامعة حلوان وفى كلية خدمة إجتماعية وبما إنى مش حباها ومش حبيت الدراسة بتاعتها كنت معقدة جداً فيها وكنت بتلككلها وبدور على أى شئ يخلصنى منها لكن لا يوجد , بسبب عدم الرغبة فى دراستها وقعت أول وقعة جامدة فى حياتى وشيلت التيرم الأول وبالتالى شيلت التيرم التانى ما احنا مش بنتعلم غير من وقعاتنا .
دراستى واخدة أهمية بس قلمى وورقتى وكلماتى هما الأهمية الأولى ومش بقدر أستغنى عنهم خالص بحبهم وبحسهم معايا دايماً وبحنلهم وبجرى عليهم لو جيه وقت وافتقدتهم .
كنت بحب المشاركة الإجتماعية فى المجتمع لكن السياسة شدتنى خاصة إن والدتى بتقوللى إنى وأنا صغيرة كنت دايماً أقعد قدام النشرة وأقرأ الجورنال وأركز أوى يمكن أكون بطبيعتى مايلة للإتجاه دوت بس ليت إن فهم السياسة مهم جداً ولقيت إن كمان من المهم إنى أدون كل حاجة فى البلد .
قلمى بيكتب عن حاجات كتيرة البلد . الحب . الشارع . المواطن . قضيتنا الفلسطينية . عن صورة منكن أشوفها فى الشارع .
كان لازم أخلى قلمى ما يبطلش ولا يقع بحلم حلم حسا إنى هقدر أحققه فى يوم من الأيام أطبــــع كتــــاب أجمع فيه كل كلمة كتبها قلمى وخطيتها على ورق وحفظته .
هى دى أنا صاحبة المدونة :)
الاشتراك في:
تعليقات الرسالة (Atom)
0 التعليقات:
إرسال تعليق