بلادى اللى بحبها

Unknown الثلاثاء، 3 مايو 2011

فى بلاد عربية عددها مش قليل كان النظام فيها بيكره شعوبها فى بعضها , بلاد أتاريها أقرب ما تكون لبعضها ويمكن إحنا كمان إدينالهم الفرصة إنهم يخلو الشعوب تكره بعضها كدة , كنا بنكره الليبيين والتوانسة والجزائريين والمغاربة وكان كرهنا ليهم باين وواضح وهما كمان كانو بيكرهونا ( بس ما كناش كلنا بنكرههم ولا هما كلهم بيكرهونا ) وكنا بنتكلم عنهم وهما بيتكلموا عننا .

كنا دايماً لما تحصل مشكلة نلاقى المسئولين باردين فى رد الفعل ودة كان بيضايق الشعب وبيخليه يصدر هو رد فعل سيئ للآخرين ودة شوفناه كويس جدا ً فى ماتش الكورة اللى حصل بين مصر والجزائر بغض النظر عن مين اللى غلطان المسئولين فى الأول كانو باردين وبعد كدة تصريحاتهم ما فيش فيها شئ واضح يهدى النفوس اللى مشحونة من بعضها .

دة شئ كان واضح لكننا بعد ما بدأت ثورات الشعوب العربية وبعد الشرارة الأولى من تونس الحبيبة بدأنا نحس قد إيه إننا المصريين بنحب التوانسة كشعب عربى وقد إيه كنا بندعيلهم وخايفين عليهم ونفسنا ربنا ينصرهم ويحميهم , ياما جات ليالى كنا بنعيط عليهم وكنا بندعى لشهدائهم إن ربنا يتقبلهم شهداء , شخصياً وعن نفسى حسيت إنى أعرف كل شاب وكل بنت وكل راجل وكل سيدة من تونس حسيت إنى بنتهم وأختهم وصديقتهم , حسيت إن كل واحد فيهم كان فيه علاقة بتربطنى بيه .

الإعلام المصرى كان بيغطى من على الوش على ما قسم وخلاص وكان فيه أسلوب التخويف مما يحدث فى تونس بيخوف المصريين من اللى حصل هناك عشان المصريين ما يفكروش يعملو زيهم .
لكننا حبيناهم :) .

أخواتنا الجزائريين كنا بندعى إنهم يثوروا وينتفضوا ويطلبوا حقوقهم وفرحنا جداً لما خرجوا يحتجوا على الغلاء وعلى قمع الحريات لمن للأسف الطاغية بتاع الجزائر حرمهم من إنهم يكملوا - لكن عندى أمل إنهم هيعملوها - , كنت لما بشوف الأخبار وأشوف أخواتنا الجزائريين فى الشارع بدعيلهم من قلبى وحسيت قد إيه دول شعب كويس جداً -بغض النظر عن أى سيئات فيهم لإن كلنا عندنا سيئات - ما زلت بحلم باليوم اللى يخرجوا فيه ويقولوا لاء بعلو الصوت وبالعدد الكبير وربنا ينصرهم على الطاغية والجبار اللى ماسكهم ويجعلهم شعب حر .

اخواتنا فى اليمن ما كنتش أعرفهم كويس وما كنتش أسمع حد بيتكلم عنهم بخير ولا بشر لكنى إتفاجئت إن الشعب دة كنا لازم نعرفو كويس , اليمنيين عرفونى يعنى إيه غن الشعب يكون إيد واحدة ودة لسبب مهم اليمنيين قبائل النظام هناك قبائلى مش عائلات زينا ودة شئ كان كتيييييييير بيقولوا إن عبدالله صالح هيقدر يوقع بينهم لكننا كلنا فوجئنا إن قبائل اليمن أو بنسبة 99% منها إتحدوا وخلو إيديهم واحدة واتفقول إنهم لازم يبقوا أقوياء وبقالهم فترة كبيرة جداً ما اختلفوش بغض النظر عن المعارضة اليمينة لحسن حد يقولى إختلفت مع الثوار أنا بتكلم عن القبائل يا ترى كان من المفروض إننا نعرف أخوتنا فى اليمن عن قرب ولا لاء ؟!

أخواتنا فى المغرب كنا مش فاهمينهم ولا عارفينهم ولا احتكينا بيهم فى مشكلة عويصة لكننا أيام مشكلتنا مع الجزائر شتمنا فيهم ولعنا فيهم وحسينا إنهم بيكرهونا واحنا كمان حسسنا نفسنا إننا بنكرههم لكننا ما كناش نعرفهم بجد ولا فاهمينهم بجد عشان نشتمهم ونغلط فيهم لكنى ودة مش كلامى أنا لوحدى دة كلام ناس كتييييييييييييير نفسنا ربنا يجعلهم شعب عظيم شعب كريم شعب حر :) .

فيه بلاد تانية احنا ما نعرفهاش كويس وما نعرفش شعوبها كويس وبردك مش بنحبهم لكن الحق إن النظم العربية كانت بتكره الشعوب فى بعضها هما عارفين إن تقارب الشعوب واتحادهم خطر عليهم واحنا فعلاً اتحدنا بقلوبنا كللللللللللللنا , الفترة القادمة محتاجة إن الشعوب العربية بجد تبقى إيد واحدة أقل ما فيها يدعوا لعبض .

إحنا كرهنا بعض واحنا ما نعرفش بعض ولازم دلوقتى نحب بعض بجد لازم ندعى لبعض ولازن نتضامن مع بعض لازم ننزل نقول إننا مش راضيين ومش موافقين على اللى بيجرى لأخواتنا فى البلاد العربية أخواتنا فى سوريا وليبيا واليمن وفلسطين وفى كل مكان .